Actualités

Tèrye Wouj, Jedi 21 Me 2020 : Inisyativ Patriyot Maryen (IPAM) - Koze pou jounalis

Eske sosyete a dwe bandonnen lit politik pou kowona viris

Alapapòt IPAM ap salye kouraj Pierre Esperance pou pèsekisyon lap sibi pa pouvwa Tetkale, Nou pwofite voye mo senpati nou bay Senatè Kassy Minis Minis Jistis Defakto Lukmann Delil soti asasinen, epi nap swete kouraj bay fanmi ak Zanmi Gana nan Site Solèy Pouvwa kriminel la asasinen, Nou pwofite di Kanmarad Gana nan non IPAM ak tout militan konsekan nan rejyon an bon Travèse

2020 pote yon nouvo modèl kalamite ki boulvèse nannan sosyete nan tout peyi.

Sitiyasyon dominasyon gwo peyi yo sou ti peyi yo mete kanpe yon sistèm eksplwatasyon bout di, kote kapitalis yo pa enterese ak moun, sitou sila ki pov yo, men, yo pito fè kob nan kondisyon ki pa respekte menm lanati.

Mond lan an boulatcha; chanjman klimatik, mizè, grangou, maladii tankou: Sida , Malarya Tibèkiloz nan yon dividal peyi pov, sou tray sa yo depi plis pase 3 mwa limanite ap fè eksperyans yon maladi san fontyè ki rele Corona viris kap banbile san distenksyon nan tout peyi.

Pare pa pare, maladi sa kapab fe anpil dega nan Peyi Dayiti.

Pandan prezidan Jovenel ap klewonnen pawòl kowona, plis pase 217 milyon dola èd pou corona anfouraye nan palè, nan Primati ak Ministè yo menm jan 4.7 milya dola PetwoKaribe yo te defilfare.

Nou nan tèt chaje! Prezidan, Minis, tout dirijan nan peyi Dayiti gen yon sèl mak fabrik, rayisman pèp Ayisyen .

Prezidan Jovenel Moise, ak gwo akolit li yo ap byen mennen pandan popilasyon an ap trennen.

Nou dwe aji!

kowona pa kowona, deklarasyon manti, fo pwomès denonsiyasyon, akizasyon prezidan Jovenel yo kontinye pi rèd, Vòl, piyay, kòripsyon, pèsekisyon politik se sèl zèl kat Tètkale Bannann yo rete pou kenbe pouvwa epi ranfòse gouvènans krazebrize an nan Tèt peyi a.

Kriz sou kriz, lavi nan peyi Dayiti vin’n pi konplike. Grangou kowona Jovenel la menase depafini ak nou anvan maladi Kowona Viris s pran chè nan peyi an.

Peyi a dekoupe an miyet moso. Chak moso anba kontwòl plizyè Zakari Delva, Bòs Pent, Tiboule. Yo gen monopòl komès, monopòl kontrebann ak monopòl represyon. Atoufè sa yo reyini anpil gwo bwasè, gwo dilè dwòg nan leta Jovnel la ki mare sosis ak kazek, majistra, delege, minis, senate, fanmi , zanmi prezidan ak lot gwo zotobre, kap mache anvayi tè peyizan tankou se chen fou ki vare sou chawony.

Nap site kek ekzanp: nan Katye Moren zòn Mòn Pele ki chaje ak lò selon anpil etid, depite Okap laproblem, Jean Etienne ak lòt kolèg mafya jwenn sipò larenn Dèmalòg, Martine Moise, ap krazebrize, degèpi peyizan ki tap viv nan tout trankilite sou espas tè sa yo.

Limonad, zòn pistè yon rejiman depite Tètkale Bannan kase ponyèt peyizan Òganizasyon AKEP , epi poze lapat sou tout tè yo tap travay. Poutan Fanmi Nazon gen plis pase 500 kawo tè ilegal nan zòn Mouchinèt, Limonad, leta pa demontre pyès volonte pou pwan 2,3 kawo pou ta fè yon sit dechaj modèn ak transfòmasyon Fatra an gaz natirèl.

Nan Depatman Nòdès menm se rèl kay Makorèl!

Gwo Zouzoun rejim Tètkale Bannann yo ap vòlè tout èspas tè ki bò wout ak bò lanmė. Leta Kòwonpi Prezidan Jovenel la ap konstwi yon pò prive pou remet yon klik boujwa kontrebandye yon manyè pou legalize aktivite kontrebann.

Koutye operasyon sa yo se Senatè poudre Herve Foucan, Vis prezidan jepete klere Ardouin Zephirin, Senatè Wanick Pierre ak kontrebandye Jacques Jean Kenan alyas Ton Kouzen prezidan jovenel, nouvo Aderbal Lherisson rejyon an.

Operasyon koukouwouj dèyè tè ekip Jovenel la ap mennen an lage plis pase 10 000 peyizan de bwa balanse, 6000 kawo tè deja anba pat kasav yo. Tout Zak dechèpiyaj sa yo, se pou satisfè enterè Jovnel Moise, Cherif Abdalla, Allain Zurech, Olivier Barro ak lot akolit ekip mafya tetkale yo.

Pèp Aysyen Alaso, Nou dwe aji!

li klè Jovnel Moise ap prepare yon lot masak Jean Rabel, Pyat, Kafou Machatè.

Maladi Kowona pa dwe jistifye silans nou devan represyon, pèsekisyon, kanpay laterè dirijan pouvwa mafya sa ap mennen sou peyi an. Si nou pa prese voye Jovnel ale, lap demantibile nou avan maladi kowona ta touye anpil nan nou. Moman an rive pou nou pran 4 pa distans ak Jovnel, 3 pa distans ak kowona.

Nap kanpe pou’n goumen pou pita pa pi tris, Vye manman pare pou Zepina , Zepina pare pou Vye Manman. Manchèt peyizan dwe toujou file pou koupe vye zèb nan raje.

IPAM konsakre rès ane 2020 an : ane solidarite. Solidarite pou’n dechouke tout viris, tout pichon, tout madichon.

Viris kowona, tankou Viris Tetkale Jovnel pa dwe mache sou moun!

Ansanm, Ansanm pou yon sosyete san fòs kote.

Hughes Celestin
Kòdonatè Depatman Nò